-កុំទទួលទានទឹកឃ្មុំ ជាមួយនឹងតៅហ៊ូ ៖
របស់ទាំង២នេះ មិនអាចទទួលទានរួមគ្នាបានឡើយ ព្រោះទឹកឃ្មុំ មាន គុណសម្បត្ដិធ្វើឱ្យក្ដៅ រីឯតៅហ៊ូ មានគុណសម្បត្ដិធ្វើឱ្យត្រជាក់ បណ្ដេញជាតិក្ដៅ ចេញពីឈាម។ នៅពេលដែលក្ដៅ នឹងត្រជាក់ប៉ះគ្នា អាចធ្វើឱ្យអ្នកក្ដៅខ្លួន គ្រុនបាន។ ចំណែកខាងវិទ្យាសាស្ដ្រក៏បានបកស្រាយដែរថា តៅហ៊ូ និងទឹកឃ្មុំ មិនអាចនៅជាមួយគ្នាបានឡើយ ព្រោះអង់ហ្ស៊ីមរបស់ទឹកឃ្មុំ នឹងទៅបំផ្លាញ សារធាតុប្រូតេអ៊ីន នៅក្នុងតៅហ៊ូ ធ្វើឱ្យបាត់បង់គុណតម្លៃអាហារបាន។
-កុំទទួលទានទឹកឃ្មុំ បើអ្នកមានជំងឺទឹកនោមផ្អែម ៖
ទឹកឃ្មុំ មានជាតិស្ករប្រភេទគ្លុយកូស (Glucose) និងហ្វ្រ៊ុកតូស (Fructose) ដែលរាងកាយអាចស្រូបយកបានភ្លាមៗ ក្នុងកម្រិតខ្ពស់។ ប្រសិនបើ អ្នកមានជំងឺទឹកនោមផ្អែម នៅពេលដែលអ្នកទទួលទានទឹកឃ្មុំ ធ្វើឱ្យថ្លើម បញ្ចេញអ័រម៉ូនអ៊ីនស៊ូលីន មកគ្រប់គ្រងជាតិស្ករ មិនទាន់ ធ្វើឱ្យអាការជំងឺ កាន់តែកើតឡើងលឿនជាងធម្មតា។
-កុំទទួលទានទឹកឃ្មុំ ជាមួយទឹកក្ដៅ ៖
ទឹកដែលអ្នកយកមកលាយជាមួយទឹកឃ្មុំ មិនគួរមានកម្ដៅលើសពី ៤០អង្សាសេឡើយ ព្រោះកម្ដៅ នឹងបំផ្លាញអង់ហ្ស៊ីម វីតាមីន អាស៊ីដអាមីណូ និងសារធាតុអាហារនៅក្នុងទឹកឃ្មុំ។
-កុំទទួលទានទឹកឃ្មុំ នៅពេលរាករូស ៖
ភាគច្រើន នៅពេលកើតមានអាការរាករូស មនុស្សជាច្រើន លាយទឹកឃ្មុំ ជាមួយទឹកក្ដៅឧណ្ហៗ ទទួលទានជំនួសទឹកអំបិលរ៉ែ ព្រោះគិតថា វាទទួលបានប្រយោជន៍ច្រើនជាង។ ប៉ុន្ដែ តាមការពិត វាកាន់តែធ្វើឱ្យ អ្នករាករូសកាន់តែខ្លាំងទៅវិញទេ ព្រោះទឹកឃ្មុំ គឺជាថ្នាំបញ្ចុះ ប្រសិនបើអ្នកទទួលទានទៅ វាអាចធ្វើឱ្យអ្នកអស់កម្លាំង ដោយមិនដឹងខ្លួនបាន។
-កុំទទួលទានទឹកឃ្មុំ ជាមួយគូឆាយ ៖
គូឆាយ ជាបន្លែមួយប្រភេទដែលមានវីតាមីនសេ C យ៉ាងច្រើន ប៉ុន្ដែ នៅពេលដែលវីតាមីន C ប៉ះជាមួយលោហៈទង់ដែង និងជាតិដែក ដែលមាននៅក្នុង ទឹកឃ្មុំ វាអាចបណ្ដាលឱ្យមានអុកស៊ីដកម្ម ធ្វើឱ្យបាត់បង់គុណតម្លៃអាហារបាន។ ម្យ៉ាងទៀត គូឆាយ គឺជាបន្លែដែលមានកាកសរសៃខ្ពស់ ប្រសិនបើអ្នកទទួលទានជាមួយទឹកឃ្មុំ វាអាចនឹងបណ្ដាលឱ្យអ្នក រាករូសបាន៕ (Refer: AKT)
