ម៉ាស៊ីនត្រជាក់រថយន្ត មានតួនាទីផ្តល់ផាសុកភាពដល់អ្នកជិះក្នុងរថយន្ត ដូច្នេះ ដឹងពីវិធីត្រួតពិនិត្យម៉ាស៊ីនត្រជាក់ ដើម្បីឱ្យវាអាចប្រើការបានយូរ...។
-កម្រិតភាពត្រជាក់ នៅដូចដើមឬទេ?
នៅពេលភាពត្រជាក់ និងកម្លាំងខ្យល់នៅដូចដើម ប៉ុន្តែ មានកត្តាផ្សេងចូលមកពាក់ព័ន្ធ ដូចជា នៅសុខៗស្រាប់តែកម្លាំងរុញច្រានខ្យល់ថយចុះ នេះអាចបណ្តាលមកពីកុំប្រេសសឺរ ឡើងកកជាទឹកកក ដោយសារឧបករណ៍គ្រប់គ្រងសីតុណ្ហភាព មិនកាត់ផ្តាច់ដំណើរការរបស់វា ខណៈដែលភាពត្រជាក់ បានឡើងដល់កម្រិតកំណត់ហើយ។ បើមានបញ្ហានេះ ត្រូវមួលប៊ូតុងបន្ថយកម្រិតភាពត្រជាក់ ឬបិទម៉ាស៊ីនត្រជាក់ ជាបណ្តោះអាសន្នសិន ហើយយករថយន្តទៅជួសជុលនៅយានដ្ឋាន។
-កម្តៅម៉ាស៊ីន ឡើងខ្ពស់ ៖
បើគ្រឿងម៉ាស៊ីនមានកម្តៅកើនឡើង ទោះជាបណ្តាលមកពីផ្នែកណាមួយក៏ដោយ ដូចជា ធុងទឹករថយន្តស្ទះ កង្ហារបក់បន្ថយកម្តៅមិនធ្វើការ ឬធ្វើការខុសប្រក្រតី ព្រោះប្រព័ន្ធម៉ាស៊ីនត្រជាក់ ធ្វើការមិនល្អ គឺការបញ្ចោញកម្តៅពីធុងទឹករថយន្ត និងពីបន្ទះខន់ដេនសឺរ របស់ម៉ាស៊ីនត្រជាក់ មិនល្អ ទើបធ្វើឱ្យមានបញ្ហានេះបាន។ ដូច្នេះ អ្នកគួរមានការត្រួតពិនិត្យម៉ាស៊ីនត្រជាក់ ដោយជាងជំនាញ ជាប្រចាំផង នឹងទទួលបានប្រយោជន៍ច្រើន។
-មានសំឡេងលាន់ឮ ៖
ពេលបើកម៉ាស៊ីនត្រជាក់ ស្រាប់តែមានសំឡេងលាន់ឮនៅបរិវេណកុំប្រេសសឺរ ឬនៅប្លូវើរ របស់ម៉ាស៊ីនត្រជាក់ អាចបញ្ជាក់ថា មានអ្វីមួយស្ទះនៅបរិវេណនោះហើយ។ បើស្ទះនៅបរិវេណប្លូវើរ អាចយកចេញ ឬសម្អាតបានងាយ ប៉ុន្តែ បើចូលទៅដល់កុំប្រេសសឺរ នឹងធ្វើឱ្យម៉ាស៊ីនត្រជាក់ មិនត្រជាក់ ហើយអាចធ្វើឱ្យកើតមេរោគទៀតផង៕
