មនុស្សមួយចំនួន មានទម្លាប់ដុសធ្មេញ រាល់ពេល ក្រោយទទួលទានអាហារ ជាពិសេស បើទទួលទានអាហារដែលមានរសជាតិផ្អែម នំចំណីផ្សេងៗ រួមទាំងភេសជ្ជៈមានជាតិហ្គាស់ ព្រោះបើទទួលទានអាហារទាំងនេះហើយ មិនដុសធ្មេញ អាចធ្វើឱ្យធ្មេញឆាប់ពុក ។
ប៉ុន្ដែ ការពិត ការដុសធ្មេញក្រោយទទួលទានអាហារភ្លាមៗ អាចធ្វើឱ្យស្រទាប់របស់ធ្មេញ ត្រូវបំផ្លាញ ដោយការត្រូវបំផ្លាញរបស់ស្រទាប់ធ្មេញនោះ កើតពីការដុសធ្មេញក្រោយទទួលទានភេសជ្ជៈភ្លាមៗ អាចធ្វើឱ្យស្រទាប់ស្រោបការពារធ្មេញ ចាប់ផ្ដើមស្ដើង ក្រោយពីអ្នក ដុសធ្មេញភ្លាម ក្នុងអឡុង១ម៉ោង ពេលភេសជ្ជៈដែលមានជាតិហ្គាស់ បានធ្វើប្រតិកម្មជាមួយធ្មេញ ធ្វើឱ្យដង់ទីន (Denten) ដែលជាស្រទាប់ ជ្រៅជាងសារធាតុស្រោបធ្មេញ កើតការសឹកកាន់តែងាយ ធ្វើឱ្យធ្មេញ ទន់ខ្សោយ ។
បើតាមលោកសាស្ដ្រាចារ្យវេជ្ជបណ្ឌិត មេឡានី ឌីចាមីល អ្នកជំនាញផ្នែកសុខភាពមាត់ធ្មេញ នៅសាកលវិទ្យាល័យ ទ្រីសាក់ទី ក្នុងទីក្រុងហ្សាការតា ប្រទេសឥណ្ឌូណេស៊ី បានមានប្រសាសន៍ថា ភាពជាអាស៊ីដ របស់ទឹកមាត់ នឹងថយចុះ នៅពេលយើងទទួលទានអាហារ ប្រសិនបើយើង ប្រញាប់ដុសធ្មេញភ្លាម ក្រោយទទួលទានអាហារ នឹងបំផ្លាញរចនាសម្ព័ន្ធ របស់ទឹកមាត់ ដែលមានតួនាទីជួយដល់ប្រព័ន្ធរំលាយអាហារ។ យកល្អ គួរខ្ពុរមាត់ដោយទឹក ក្រោយទទួលទានអាហារ ដើម្បីបន្ថយចំនួនបាក់តេរីក្នុងមាត់។
ដូច្នេះ កុំប្រញាប់ដុសធ្មេញភ្លាមៗ ក្រោយពេលទទួលទានអាហារ រង់ចាំឱ្យកន្លងហួស១-២ម៉ោងសិន សឹមដុសធ្មេញ ដើម្បីឱ្យធ្មេញ រឹងមាំបានយូរអង្វែង៕
