ថើប ជាភាសាផ្នែករាងកាយមួយ បង្ហាញពីក្តីស្រលាញ់។ ម៉្យាងទៀត ការថើប អាចបង្ហាញពីការរាក់ទាក់គ្នា ការនិយាយ លាគ្នា ការបង្ហាញពីការនឹករលឹក ឬពេលខ្លះ ជាការបើកឆាកស្នេហា...។
-ការថើប និងសម្ព័ន្ធភាព ៖
ចំពោះអ្នកដែលរៀបការរួច ការថើប អាចជាការស្ទាបស្ទង់ពីក្តីស្រលាញ់ ដូចជា ផ្តល់ការស្វាគមន៍ ការលាគ្នា ជាដើម។ ម៉្យាងទៀត តាមរយៈការថើប គូស្នេហ៍អាចសង្កេតដឹងថា ដៃគូរបស់ខ្លួន មានអាការខុសប្រក្រតីយ៉ាងណា ទោះបីជាអ្នកបានរៀបការមកជាយូរ រាប់សិបឆ្នាំហើយក៏ដោយ។
-រឿងដែលអាចបំផ្លាញការថើប ៖
មុនពេលថើប អ្នកដែលពាក់វ៉ែនតា ចាំបាច់ត្រូវដោះវ៉ែនតាចេញ។ ម៉្យាងទៀត ប្រសិនបើអ្នកពត់ធ្មេញ អ្នកត្រូវប្រាកដថា អ្នកមិនបាច់ថើបគ្នាខ្លាំងពេកនោះឡើយ ព្រោះបើមិនដូច្នោះទេ ដែកដែលស្រោបធ្មេញ អាចនឹងសង្កត់មាត់បាន។ តែបើភាគីទាំងសងខាង សុទ្ធតែពត់ធ្មេញដូចគ្នា អ្នកមិនចាំបាច់បារម្ភឡើយ ព្រោះការថើបបែបធម្មតា មិនធ្វើឱ្យប៉ះពាល់ដល់ដែកឡើយ។
-បទពិសោធន៍នៃការថើប ៖
ចំពោះអ្នកដែលទើបតែថើបជាលើកដំបូង នឹងមានអារម្មណ៍ថា ជាការឱបរឹត និងជាសញ្ញាមួយដែល ឈានទៅដល់ការរួមភេទ ដោយមិនបានត្រៀមខ្លួន។ ប៉ុន្តែ ចំពោះអ្នកដែលរៀបការហើយ ការថើប នឹងមានការថយចុះ ឬថើបត្រឹមតែបន្តិចបន្តួច មិនមានភាពស្និទ្ធស្នាលដូចមុនឡើយ។
-ចំណុចគួរប្រយ័ត្ន ក្នុងការថើប ៖
ចំណុចដែលអ្នកគួរប្រយ័ត្នបំផុត ក្នុងពេលថើប គឺក្លិនមាត់ ដែលអ្នកអាចកម្ចាត់វាដោយ បៀមស្ករគ្រាប់ ឬស្ករកៅស៊ូក្លិនជីរអង្កាម គ្រប់ពេល ឬមុនពេលថើប។ ចៀសវាងទទួលទានអាហារដែលមានក្លិនខ្លាំង ដូចជា ខ្ទឹមស និងខ្ទឹមបារាំង ជាដើម។ ចំពោះអ្នកដែលមិនជក់បារី ប្រាកដជាមិន ចូលចិត្តក្លិនបារីឡើយ។ ដូចនេះ អ្នកត្រូវកម្ចាត់ក្លិនបារី ឱ្យអស់ជាមុនសិន។ មិនត្រូវសើចឡើយ ក្នុងពេលថើប។
-រឿងដែលគួរដឹងពីការថើប ៖
ការថើបធ្វើឱ្យសាច់ដុំ២៩ផ្នែក នៅលើផ្ទៃមុខ មានចលនា។ មានន័យថា ការថើប ជាវិធីធ្វើចលនាសាច់ដុំដែលល្អបំផុត ដើម្បីការពារភាពជ្រីវជ្រួញ។ នៅក្នុងទឹកមាត់ ដែលគូស្នេហ៍ប្តូរគ្នា ក្នុងអំឡុងពេលថើបនោះ មានសារធាតុផ្សេងៗជាច្រើន ដូចជា ជាតិខ្លាញ់ អំបិលរ៉ែ ប្រូតេអ៊ីន ជាដើម។ តាមការសិក្សាថ្មីៗនេះ បានរកឃើញថា ការផ្លាស់ប្តូរសារធាតុទាំងអស់នេះ ជួយជំរុញដល់ការផលិតអង្គបដិបក្ខ ក្នុងការកម្ចាត់មេរោគប្រភេទផ្សេងៗ ដែលមាននៅក្នុងរាងកាយ។ ក្នុងពេលថើបគ្នា រាងកាយនឹងផលិតសារធាតុដែលធ្វើឱ្យញៀនជាងម័រហ៊្វីន ដល់ទៅ២០០ដង ជាហេតុធ្វើឱ្យគូស្នេហ៍មានអារម្មណ៍ថា មានសេចក្តីសុខ៕
