ថ្ងៃសែនទីជូអៀ ឬជំនាងផ្ទះ ៖
ក្រៅពីការសែនទីជូអៀ តាមប្រក្រតី ដែលសែនរៀងរាល់ថ្ងៃឈិវអ៊ិក និងចាប់ង៉ូវ គឺថ្ងៃទី០១ និងថ្ងៃទី១៥ រៀងរាល់ខែ តាមប្រតិទិនចិន នៅមានការសែនក្នុងថ្ងៃទី០២ និងទី១៦ ទៀតផងដែរ ដែលហៅថា ចងែ ឬសែនងែ ជាពិសេសបំផុត គឺងែដំបូង ថ្ងៃទី០២ ខែ១ និងងែចុងក្រោយ ថ្ងៃទី១៦ ខែ១២ រៀងរាល់ឆ្នាំ នឹងមានការសែនព្រេនយ៉ាងធំដុំ ដើម្បីសុំពរពីជំនាងផ្ទះ និងជាការដោះពាក្យបណ្តាសា តបស្នងបុណ្យគុណចំពោះទីជូអៀ ដែលបានជួយឃុំគ្រង ថែរក្សាអ្នករស់នៅក្នុងផ្ទះ ឱ្យរស់នៅបានសុខសប្បាយ សុខភាពល្អ ប្រកបរបររកស៊ី ឬធ្វើការងារផ្សេងៗបានរលូនល្អ។
ការសែនទីជូអៀ ឬជំនាងផ្ទះ ៖
ត្រូវសែនដោយធូប ៥ដើម (សំដៅដល់ឆៃស៊ិងអៀ “ទីជូអៀ” ឬអាទិទេព នៃជោគលាភ ដែលមានសេនា៤នាក់ គឺសៀវ សេង, ឆៅ ប៉, តាំង គីវកុង, អៀវ សៀស៊ី) ទៀន ១គូ, ផ្កា, ទឹកតែ ៥ពែង។
ចំពោះអត្ថន័យក្នុងការប្រើធូប ៥ដើម គឺសំដៅទៅលើធាតុទាំង៥ គឺ ដី មាស ទឹក ឈើ ភ្លើង។
ពាក្យដែលត្រូវនិយាយ នៅពេលសែន ៖
-ដោតធូបដើមទី១ សូមឱ្យមនុស្សទាំងអស់ក្នុងគ្រួសារ រស់នៅដោយមានសេចក្តីសុខ ធ្វើដំណើរដោយសុវត្ថិភាព។
-ដោតធូបដើមទី២ សូមឱ្យគ្រប់គ្នាក្នុងគ្រួសារ មានសំណាងល្អ មាសប្រាក់ លាភសក្ការៈ ហូរចូល។
-ដោតធូបដើមទី៣ សូមឱ្យគ្រប់គ្នាក្នុងគ្រួសារ រស់នៅចុះសម្រុងគ្នាល្អ គ្មានរឿងឈ្លោះប្រកែកគ្នា។
-ដោតធូបដើមទី៤ សូមឱ្យគ្រប់គ្នាក្នុងគ្រួសារ មានអ្នកឧបត្ថម្ភគាំទ្រ គ្រប់ទិសទាំង៤។
-ដោតធូបដើមទី៥ សូមឱ្យគ្រប់គ្នាក្នុងគ្រួសារ គិតប្រាថ្នាអ្វីៗបានសម្រេច ដូចបំណង គ្រប់ប្រការ។ នៅពេលដោតធូប ត្រូវដោតធូបម្តង ១ដើមៗ បន្ទាប់ពីនោះ ពោលពាក្យអធិដ្ឋានសក្ការៈបូជា បួងសួងបន់ស្រន់ប្រាថ្នា ដោយអាចនិយាយឮៗ ឬខ្សឹបៗ ជាភាសាខ្មែរក៏បាន ចិនក៏បាន៕
