១-ទទួលទានទឹក ឱ្យបានច្រើន ពេញ១ថ្ងៃ ៖
គួរដាក់ទឹកតាមខ្លួន ជានិច្ច ព្រោះទឹក មានសារសំខាន់ណាស់ ដល់គ្រប់ប្រព័ន្ធក្នុងរាងកាយ និងកោសិកាស្បែក។ ការទទួលទានទឹក បានគ្រប់គ្រាន់ អាចជួយបន្ថយការអស់កម្លាំង ធ្វើឱ្យរាងកាយ ស្វាហាប់។ ប៉ុន្តែ បើអ្នកមិនចូលចិត្តទឹកសុទ្ធធម្មតា អ្នកអាចទទួលទានទឹកតែ ស្រាលៗ ឬអាចច្របាច់ក្រូចឆ្មារ បន្ថែមរសជាតិក៏បាន។
២-បន្ថយការទទួលទានកាហ្វេ និងភេសជ្ជៈដែលមានជាតិស្ករ និងកាហ្វេអ៊ីន ៖
ដូចជា ទឹកក្រូចមានជាតិហ្គាស់ ភេសជ្ជៈប៉ូវកម្លាំង ព្រោះជាតិស្ករ និងកាហ្វេអ៊ីន ជួយជំរុញឱ្យរាងកាយមានកម្លាំង ប៉ុន្តែ បានតែរយៈពេលដំបូងប៉ុណ្ណោះ បន្ទាប់មក កម្លាំងនឹងថយចុះខ្លាំង។ ដូចនេះ អ្នកគួរទទួលទានតែបៃតង តែខ្មៅឱសថបុរាណ ដែលគ្មានជាតិស្ករ ជំនួសវិញ។
៣-កុំទទួលទាននំផ្អែម ឬទឹកស៊ីរ៉ូ ៖
ទឹកស៊ីរ៉ូ ឬជាតិផ្អែមៗ អាចធ្វើឱ្យគ្រោះថ្នាក់ ដល់សុខភាព ឡើងទម្ងន់ និងបង្កការប្រមូលផ្តុំជាតិខ្លាញ់។ អ្នកត្រូវសង្កេតថា នៅក្នុងអាហារដែលអ្នកទទួលទាន មានប្រូតេអ៊ីន ដូចជា សាច់សត្វ តៅហ៊ូ ឬស៊ុត បរិមាណសមស្របឬនៅ? បរិមាណប្រូតេអ៊ីន ដែលអ្នកគួរទទួលទាន គឺប្រហែល១/៤នៃអាហារនោះ ព្រោះប្រូតេអ៊ីន ត្រូវការពេលរំលាយយូរ ធ្វើឱ្យអ្នកមានអារម្មណ៍ឆ្អែតបានយូរ និងអាចបន្ថយចំណង់ទទួលទានអាហារ។
៤-ត្រៀមអាហារសម្រន់មកពីផ្ទះ ៖
អ្នកគួរត្រៀមអាហារតាំងពីពេលយប់ ដើម្បីងាយស្រួលនៅពេលព្រឹក មុនពេលទៅធ្វើការ។ អាហារសម្រន់ ដែលងាយស្រួលរក ដូចជា ទឹកដោះគោមិនដាក់ស្ករ ឬទឹកសណ្តែក គ្រាប់ល្ពៅ ឬគ្រាប់ផ្កាឈូករ័ត្ន ចេក សណ្តែកអាល់ម៉នដ៍ដែលមិនប្រៃ ទឹកដោះគោជូរ នំប៉័ងហូលវីតលាបប៊័រសណ្តែក បន្លែស្រស់ ដូចជា ត្រសក់ហាន់ចំណិតៗ ជាដើម។ ជាពិសេស អ្នកគួរមានអាហារទាំងនេះ នៅក្នុងផ្ទះ ជានិច្ច។
៥-ធ្វើចលនារាងកាយពេញ១ថ្ងៃ ៖
ជំនួសការអង្គុយធ្វើការតែម៉្យាង អ្នកអាចឈរ លើកជើង ចុះឡើងៗ ដើម្បីឱ្យឈាមហូរបានស្រួលជាងមុន ជាពិសេស អ្នកត្រូវងើបឈរ រាល់៣០នាទីម្តង។ ចំណែកពេលសម្រាកថ្ងៃត្រង់ អ្នកគួរដើរ ឱ្យបាន១០-១៥នាទី ឬ ហាត់ប្រាណ ដោយឧបករណ៍ជិះកង់។ ការហាត់ប្រាណ មិនត្រឹមតែធ្វើឱ្យរាងកាយ ធ្វើការដុតបំផ្លាញ ថាមពលប៉ុណ្ណោះទេ ថែមទាំង បំបាត់អារម្មណ៍តានតឹង បានយ៉ាងល្អ។
ក្រៅពីចំណុចខាងលើ ការកំណត់ថា នឹងទទួលទានអាហារអ្វី នៅក្នុងសប្តាហ៍នីមួយៗ គឺជាទង្វើដ៏ល្អ ជួយឱ្យអ្នកទទួលទានអាហារដែលល្អ ដែលនាំឱ្យសុខភាពល្អទៀតផង។ លើសពីនេះ វាជួយ អ្នកគ្រប់គ្រងពេលវេលា និងសន្សំសំចៃប្រាក់ ដោយអ្នកគួររៀបចំការកំណត់ ដូចខាងក្រោម ៖
-តើនឹងទួលទានអ្វី នៅពេល៣-៤ថ្ងៃ ខាងមុខ?
-សរសេរពីអាហារដែលអ្នកត្រូវទិញ មុននឹងទៅផ្សារ និងរៀបចំជាផ្នែកៗ ដូចជា បន្លែ ផ្លែឈើ សាច់ ឬរបស់ក្រៀមៗ ជាដើម។
-អ្នកគួរទៅទិញអាហារនៅពេលណាដែល អ្នកមិនមានការប្រញាប់ ដូចជា ព្រឹកថ្ងៃអាទិត្យ ឬ ពេលរសៀល ជាដើម។
-កុំទុកឱ្យពោះទំនេរ នៅមុនពេលដើរទិញអីវ៉ាន់ ព្រោះអាចធ្វើឱ្យអ្នក ទិញអាហារ ឬនំដែលមិនសូវល្អ ដល់សុខភាព។
ក្រៅពីនេះ នៅមានអាហារដើម្បីសុខភាព ល្អជាច្រើនទៀត ដែលអ្នកចាំបាច់ត្រូវបម្រុងទុក នៅក្នុងផ្ទះជានិច្ច ដូចជា បន្លែ ផ្លែឈើ ទឹកដោះគោ អង្ករសំរូប សាច់សត្វ ស៊ុត ជាដើម៕
