*សម្ភារៈត្រូវការ :
-ធុងសាំងមួយ កាត់មាត់ត្រឹមពាក់កណ្តាលមិនឲ្យដាច់
-មែកឈើតូចៗ
*វិធីផលិត :
-កាត់មែកឈើប្រវែង ៣ តឹក តម្រៀមបញ្ឈរៗឲ្យបានពេញណែន ក្នុងធុងសាំង រហូតពេញដល់មាត់ ធុងដែលកាត់ រួចទាញបិទគម្របម្ខាងដែលបានកាត់វិញ ។
+ជីករណ្តៅមួយរាងទ្រវែង ល្មមអាចដាក់ធុងសាំងនេះដុតពីលើបាន រណ្តៅនេះមិនត្រូវឲ្យមានមាត់ធំពេកទេ គឺល្មម ដាក់ធុងសាំងដុតកុំឲ្យវាធ្លាក់ចុះក្រោមបាន រួចយកធុងដែលបានដាក់កណាត់ឈើ ពីលើរណ្តៅ ។ បន្ទាប់មក ដុតភ្លើងពីក្រោមធុងសាំង តែមិនត្រូវ ឲ្យឆេះឈើនៅក្នុង ធុងសាំងនោះទេ ។
+ដុតរហូតកំទេចកំទី មែកឈើក្នុងធុងសាំងនោះក្លាយទៅជាធ្យូង មានពណ៌ខ្មៅ នោះយើងអាចយកវាមកប្រើការបានហើយ ។
តាមការពិតវិធីផលិតធ្យូង ( Biochar) ប្រភេទនេះ គេមានវិធីផលិតមួយហ្មត់ចត់ ជាង និង មានប្រសិទ្ធភាពជាង ប៉ុន្តែវាទាមទារ ឲ្យយើងត្រូវចំណាយច្រើនជាងនេះ គឺត្រូវកាត់មាត់ធុងសាំងធ្វើជា ប្រឡោះមួយ រួចធ្វើគម្របមួយសម្រាប់ក្របវាភ្ជិត ទៅវិញ ស្វានប្រហោងមួយទំហំ ៥ ហ៊ុន សម្រាប់ឲ្យផ្សែងចេញ ដោយប្រើបំពង់ដែកមួយ ធ្វើជាបំពង់បង្ហុយ ។ បើយើងអាចប្រើវិធីនេះបានវាមានធ្យូងដែលមានគុណភាពល្អជាង ។
អ្វីដែលយើងផលិតបាននេះ គឺជាធ្យូងដែលអាចឲ្យយើង យកមកដំឲ្យខ្ទេចម៉ត់ រួចយកទៅដាក់តាមគុម្ពដំណាំ ដោយមានលុបដីគ្របពីលើផង ចំនួនដែលយើងដាក់ គឺគ្មានកំណត់ទេ យើងអាចដាក់ដើម ១០ គីឡូ ឬ ៥ គីឡូក៏បាន ទៅតាមចំនួនធ្យូងដែលយើងមាន ដំណាំណា ដែលមិនសូវដុះលូតលាស់ ឬក្រិន យើងអាចប្រើធ្យូងនេះ ត្រាំជាមួយទឹករួចស្រោចជុំវិញកាកដែលនៅសល់ ចាក់ដាក់គល់វា រួចលុបដីពីលើ បន្តធ្វើបែបនេះ រហូត យើងឃើញមានការប្រែប្រួលទៅលើដំណាំ ដែលដុះ លូតលាស់មិនល្អនោះ ចាប់ផ្តើមប្រែប្រួល បន្ទាប់ពីនោះត្រូវបន្តធ្វើរៀងរាល់មួយខែម្តងៗ រហូតដល់វាទទួលបានផ្លែផ្កា ។
វិធីដែលងាយជាងគេនោះ គឺយើងអាចរកទិញផេះ អង្កាម យកមកចាក់ដាក់រាយនៅត្រង់ទីដាំដំណាំ រួចកាប់ជ្រួយដីលុបវា បន្ទាប់មក ស្រើចទឹកឲ្យជោគ ដើម្បីឲ្យវាស្អិតជាប់ជាមួយដី មិនហើរតាមខ្យល់ទៅអស់ ។
ការប្រើធ្យូងសម្រាប់កែប្រែគុណភាពដី យើងអាចជួយឲ្យដំណាំដុះលូតលាស់បានល្អ កាត់បន្ថយការប្រើជី ធ្វើឲ្យដីធូរ គ្មានមេរោគ អាចរក្សាសំណើមបានប្រសើរជាង មិនតែប៉ុណ្ណោះផលដែល យើងទទួលបានក៏ប្រសើរជាងដែរ ៕
