បណ្តាគ្រូពេទ្យ បានបង្ហាញថា ការប្រើកុំព្យូទ័រ ច្រើនពេក អាចប៉ះពាល់ដល់វ័យវឌ្ឍនការរបស់ កុមារ ដូចជា ខាងផ្នែករាងកាយ បង្កឱ្យកើតមានអាការ ឈឺរួយ រហូតដល់ពិការបាន ព្រោះឆ្អឹង និងសាច់ដុំ មិនបានលូតលាស់ពេញលេញ ឯខាងផ្នែកចិត្តគំនិត បង្កឱ្យកើតមានភាពព្រហើនកោងកាច និងខ្វះការ ស្វែងយល់សង្គម ព្រោះឋិតនៅក្នុងពិភពរបស់ខ្លួនឯង ច្រើនពេក រហូតដល់មិនចាប់ច្រើនអារម្មណ៍អ្នកដទៃ ដែលផលប៉ះពាល់ទាំងនេះ អាចកើតឡើងបាន ប្រៀបដូចជា កុមារញៀនទូរទស្សន៍ដែរ។
តាមសេចក្តីរាយការណ៍ព័ត៌មាន ពីប្រទេស អង់គ្លេស បានឱ្យដឹងថា កុមារភាគច្រើន មានបញ្ហា សុខភាព គឺមានអាការឈឺចុករួយរ៉ាំរ៉ៃ ព្រោះនៅតែ ជាមួយកុំព្យូទ័រ ដើម្បីធ្វើកិច្ចការសាលា (Homework) ឬលេងហ្គេម ច្រើនពេក។ ដោយសារឆ្អឹង និងសាច់ដុំ របស់កុមារ មិនទាន់លូតលាស់ពេញលេញល្អ ប្រសិនបើ មានការប្រើប្រាស់កុំព្យូទ័រមិនសមស្រប រយៈពេលយូរ អាចបង្កនូវផលវិបាកដល់កុមារបាន។
ការប្រើកុំព្យូទ័រយូរ នឹងបង្កនូវផលប៉ះពាល់ ដល់ខ្សែភ្នែក និងសាច់ដុំផ្នែកផ្សេងៗនៃរាងកាយ។ កុមារឋិតក្នុងវ័យកំពុងលូតលាស់ តម្រូវការវិវឌ្ឍន៍ សាច់ដុំ ទាមទារឱ្យមានការបញ្ចោញកម្លាំងពលកម្ម ឬហាត់ប្រាណ ឱ្យបានជាប់លាប់។ ការប្រើកុំព្យូទ័រ ច្រើន កុមារបានតែប្រើម្រាមដៃស្តាំ អាចធ្វើឱ្យពូកែ គ្លិក (Click) ប៉ុន្តែ ផ្នែកផ្សេងៗ មិនបានចម្រើនលូត-លាស់តាមនោះទេ។ ការអង្គុយនៅនឹងកន្លែងយូរៗ នឹងធ្វើឱ្យកើតមានអាការឈឺចុករួយ បានដោយងាយ។ ការរវល់នឹងកុំព្យូទ័រយូរ ធ្វើឱ្យកុមារឋិតនៅក្នុងពិភព មួយដោយឡែក ដែលគេមិនចាំបាច់ចាប់អារម្មណ៍ សមាជិកដទៃទៀតក្នុងគ្រួសារ ធ្វើឱ្យកុមារខ្វះទំនាក់ទំនង ក្នុងសង្គម និងពិបាកសម្របខ្លួនជាមួយអ្នកនៅជុំវិញ ខ្លួន។ ដូច្នេះហើយ ទើបមានលទ្ធផលការស្រាវជ្រាវ បញ្ជាក់ថា កុំព្យូទ័រ ធ្វើឱ្យកុមារព្រហើនកោងកាច ជាងមុន។
ធម្មជាតិរបស់កុមារ គឺត្រូវសម្របខ្លួនទៅនឹង ធម្មជាតិ ធ្វើការហាត់ប្រាណ និងសម្រាកឱ្យបាន គ្រប់គ្រាន់ បើមិនដូច្នេះទេ រាងកាយនឹងខ្វះតុល្យភាព និងប៉ះពាល់ដល់ចិត្តគំនិត។ ដូច្នេះ ឪពុកម្តាយ គួរនាំកូន ឱ្យប្រើជីវិតជាធម្មជាតិឱ្យបានច្រើនជាងមុន និងឱ្យកូនៗ បានបញ្ចោញកម្លាំងជាមួយមិត្តភក្តិ ដើម្បីឱ្យពួកគេ បានបញ្ចោញញើស និងជាការបង្កើតទំនាក់ទំនងល្អ ក្នុង សង្គម ជាមួយក្មេងៗវ័យស្របាលគ្នាផង។ ពិសេស ត្រូវគ្រប់គ្រងការមើលទូរទស្សន៍ មិនឱ្យលើសពី៤៥នាទី ក្នុង១ថ្ងៃ ដោយឪពុកម្តាយគួរអង្គុយមើលរួមជាមួយ កូនផង ព្រោះមានការស្រាវជ្រាវថា ការមើលទូរទស្សន៍ ច្រើនពេក ធ្វើឱ្យកុមារមីញ៉ូបភ្នែក និងមានចរិតកោងកាច ដោយសារកុមារ នៅមិនទាន់អាចញែកបាន រវាង ពិភពពិត នឹងពិភពសិល្បៈ៕ (Refer:AKT)
